Treyjan er að sjálfsögðu rauð, með gylltum línum og hvítum og rauðum kraga.

Hún hefur fengið ágætis dóma frá stuðningsmönnum félagsins en þetta er líklega síðasta treyjan sem Liverpool spilar í undir merkjum Nike.

Liverpool er að ganga frá tímamótasamningi við Adidas og ætti það að vera frágengið á næstu vikum.

Ný heimatreyja Liverpool sækir innblástur frá treyjunni sem var notuð í úrslitaleik Evrópukeppni meistaraliða í Róm árið 1984, þar sem Liverpool vann heimamenn í Roma eftir vítakeppni. Liverpool vann þrennuna það tímabil, það er að segja Evrópukeppnina, deildina og deildabikarinn.