Ten Hag segir að eigendur United geri sér grein fyrir því hvaða ástæður séu á bak við slöku gengi liðsins á tímabilinu.

„Þeir búa yfir almennri skynsemi. Þeir sjá að við höfum þurft að vinna með 32 mismunandi varnarlínur, misst átta miðverði út, nota þrettán miðvarðapör, verið án vinstri bakvarðar, glímt við öll þessi meiðsli. Þeir skilja að þetta hefur áhrif á úrslit," segir Ten Hag.

Ten Hag segist ekki ánægður með úrslitin á þessu tímabili en það þurfi að horfa raunsætt á hlutina varðandi meiðslin í leikmannahópnum. Hollendingurinn segist ekki þurfa að fá stuðningsyfirlýsingu frá stjórninni þrátt fyrir vangaveltur um framtíð sína.

„Mér er alveg sama hvort það sé opinber yfirlýsing eða ekki. Ég vinn að því bæta og þróa liðið. Það er starf mitt hérna," bætti Ten Hag við.