„Við erum allar að koma úr sitthvorri áttinni þegar hópurinn kemur saman og maður þarf alltaf að núllstilla og setja fókusinn á landsliðið. Mér finnst hafa gengið vel. Við höfum æft vel og gert eins vel og hægt er. Við erum að reyna að njóta og samstilla liðið. Það hefur verið flott."

Aðstæður á æfingasvæði Rauðu stjörnunnar voru ekki eins og best er kosið.

„Þetta eru ekki bestu aðstæður sem hægt er að vera í, en við reynum að eyða orkunni í það sem við getum haft áhrif á. Þrátt fyrir að þetta séu ekki bestu aðstæðurnar þá fannst mér góður fókus í liðinu og við vorum að gera vel. Það er gott að koma á góða grasið í dag og enn betra á morgun þegar við spilum hérna."

Verðum að bera virðingu fyrir þeim
Ísland hefur sex sinnum mætt Serbíu í A-landsliðum kvenna og alltaf unnið. Síðasti leikur þessara liða var í undankeppni HM á Laugardalsvelli 14. september 2014. Ísland vann þá 9-1 sigur þar sem Þóra Björg Helgadóttir, markvörður liðsins, var á meðal markaskorara. Glódís var einnig á meðal markaskorara í þeim leik en síðan þá hefur serbneska liðið þróast og orðið mun sterkara.

„Þetta verður allt öðruvísi leikur. Þær eru búnar að vera að bæta sig mikið frá ári til árs. Þær unnu Þýskaland sem segir rosalega mikið," segir Sandra María.

„Þetta er lið sem við verðum að bera virðingu fyrir en á sama ætlum við auðvitað að vinna þennan leik. Við þurfum að gera okkar allra besta. Við förum í þennan leik til að vinna og það er klárlega markmiðið. Við erum búnar að skoða þær vel og hvar þeirra veikleikar liggja. Við ætlum að nýta okkur þeirra veikleika til að sækja og skora mörk."

Byggja ofan á það
Síðasta ár var svolítið upp og niður hjá liðinu, en það endaði árið frábærlega, með tveimur góðum sigurleikjum.

„Það er búnar að vera miklar breytingar á okkar liði og stórir póstar búnir að detta út. Mér finnst liðið vera að bæta sig frá glugga til glugga. Í síðasta verkefni var kominn taktur í hópinn og hvernig við spilum okkar leik. Við ætlum að halda áfram að byggja ofan á það og ná í góð úrslit á morgun," sagði Sandra.

Hægt er að sjá allt viðtalið í spilaranum hér að ofan.