Íslenska landsliðskonan Berglind Björg Þorvaldsdóttir er að ganga í raðir franska A-deildarliðsins Le Havre frá Breiðabliki. Þetta kemur í tilkynningu frá Blikum í kvöld.
Berglind er fædd árið 1992 og hefur gert 12 mörk í Pepsi Max-deild kvenna með Blikum í sumar en liðið er í 2. sæti deildarinnar.
Hun hefur einnig spilað með ÍBV, Fylki, PSV Eindhoven, AC Milan og Verona og er á leið í enn eitt ævintýrið en hún hefur gert samkomulag við franska A-deildarliðið Le Havre.
Breiðablik og Le Havre hafa komist að samkomulagi um kaupverð og fer hún í læknisskoðun á fimmtudag áður en hún skrifar undir samning við félagið.
Berglind var markahæst í Meistaradeild Evrópu á leiktíðinni sem var að klárast með tíu mörk. Hún deilir þeirri nafnbót ásamt Vivianne Miedema, leikmanni Arsenal, og Emueje Ogbiagbevha, leikmanni FC Minsk. Miedema er ein sú allra besta í heiminum.
A-deildin hefst í byrjun september. Sara Björk Gunnarsdóttir, fyrrum liðsfélagi Berglindar, leikur einnig í frönsku A-deildinni en hún er á mála hjá Lyon sem vann Meistaradeildina í gær.
Athugasemdir