Elfar Árni byrjar - Hallgrímur Mar í hóp en ekki Viðar KA tapaði úti gegn Víkingi 4 - 2 í síðustu umferð og frá þeim leik gerir Hallgrímur Jónasson þjálfari liðsins eina breytingu. Elfar Árni Aðalsteinsson kemur í byrjunarliðið fyrir Ingimar Stöle sem sest á bekkinn. Athygli vekur að Viðar Örn Kjartansson er ekki í leikmannahópi KA í dag en Hallgrímur Mar Steingrímsson er í hópnum eftir að hafa glímt við langtímameiðsli.

Gestirnir í KR töpuðu gegn Breiðabliki á grasinu í vesturbænum fyrir viku síðan 2 - 3. Frá þeim leik gerir Gregg Ryder þjálfari KR engar breytingar á byrjunarliðinu en Kristján Flóki Finnbogason er í leikmannahópnum að nýju fyrir Stefán Árna Geirsson sem kom inná og skoraði í síðasta leik en er farin utan til náms að nýju.

Sandra María spáir heimasigri Sandra María Jessen, lykilmaður Þór/KA, hefur farið frábærlega af stað með sínu liði í sumar og Fótbolti.net fékk hana til þess að spá í spilin fyrir 5. umferð Bestu-deildar karla.

Það þarf ekki að koma neitt sérstaklega á óvart að markahrókurinn hefur tröllatrú á norðanmönnum og spáir KA 3-2 sigri í dag.

,,Atli Sigurjóns elskar að spila á móti KA og kemur sínum mönnum í forystu. KA menn eru hins vegar staðráðnir að landa fyrsta sigrinum í Bestu í sumar og klára þennan leik með 3-2 sigri. Sveinn Margeir hendir í alvöru sigurmark fyrir KA menn.''


Markahæsti leikmaður Bestu-deildar kvenna hefur tröllatrú á KA í dag.

Dómarinn Dómari leiksins er Twana Khalid Ahmed og honum til aðstoðar verða Kristján Már Ólafs og Bergur Daði Ágústsson. Varadómari leiksins er hinn geðþekki Birgir Þór Þrastarson og eftirlitsmaður í dag er Þóroddur Hjaltalín.

Dyntóttir KR-ingar í heimsókn Byrjun KR í Bestu-deildinni hefur verið athyglisverð. Liðið byrjaði tímabilið af miklum krafti og vann öfluga útisigra á Fylki og Stjörnunni í fyrstu tveimur leikjunum. Í kjölfarið hafa fylgt tvö töp, nú síðast á iðagrænum Meistaravöllum gegn Breiðabliki.

KR liðið virðast ekki eiga í miklum vandræðum með að finna netmöskvana, ef frá er talinn leikurinn gegn Fram - þar sem að Rúnar Kristinsson skellti í lás gegn sínu gamla liði.

Varnarleikur liðsins er aftur á móti alltof brothættur og markatala liðsins í deildinni (9:8) segir sína sögu þar. Þá hefur Guy Smit, markvörður liðsins, legið undir talsverðri gagnrýni. Hollendingurinn hefur virkað verulega óöruggur í sínum aðgerðum og ég veit ekki hvað hann var að spá þegar að hann hreinlega gaf Blikum þriðja mark þeirra í síðasta deildarleik liðsins.

Verkefni Gregg Ryder í dag og næstu vikurnar er að stilla strengi markmanns og varnar og þá ættu góðir hlutir að geta átt sér stað í Vesturbænum.


Guy Smit hefur ekki byrjað tímabilið vel.

Brekka á Brekkunni Nóg hefur verið skrifað og skrafað um gengi KA í upphafi leiktíðar. Uppskeran er ekki til þess að hrópa húrra fyrir; eitt stig eftir fjórar umferðir. Nú síðast þurftu lærisveinar Hallgríms Jónassonar að sætta sig við 4-2 tap gegn Íslandsmeisturum Víkings, en þar komust norðanmenn í 0-1, áður en Víkingslestin fór af stað og breytti stöðunni í 4-1. Elfar Árni Aðalsteinsson lagaði stöðuna seint í leiknum og 4-2 urðu lokatölur.

Það verður seint talið ófyrirgefanlegt að tapa í Fossvoginum gegn frábæru Víkingsliði, en töpuð stig á heimavelli gegn HK og Vestra eru allt önnur saga. Ef að illa fer í dag að þá er bakið komið upp við vegg og hver úrslitaleikurinn á fætur öðrum framundan. KA menn þurfa að fara sækja stig í hinn margnotaða poka.


Fagna KA menn í dag?

Góðan daginn! Hér mun fara fram textalýsing á leik KA og KR í Bestu-deild karla. Leikurinn er liður í 5. umferð deildarinnar og er afar mikilvægt fyrir bæði lið að ná í sigur í dag - af ólíkum ástæðum.