Valur tilkynnti um framlenginguna á samningnum í dag.

Af hverju ákvað Hólmar að framlengja við Val?
„Það er fyrst og fremst vegna þess að ég upplifi marga spennandi hluti innan félagsins. Að mínu mati hefur Valur tekið mörg skref í rétta átt undanfarið og ég vil vera hluti af því," sagði Hólmar við undirskrift.

Hólmar verður 34 ára í ágúst segir líkamann líka vera í flottu standi.

„Svo hef ég bara mjög gaman af því að spila fótbolta og elska að mæta á æfingar og spila með þessum strákum.“

Björn Steinar Jónsson varaformaður knattspyrnudeildar Vals er ánægður með framlenginguna við fyrirliðann. „Það var aldrei spurning í okkar huga að endurnýja samninginn við Hólmar. Hann er mikill leiðtogi hjá okkur og hefur vaxið með hverju árinu hér í því hlutverki. Hólmar Örn verður lykilmaður hjá okkur hér að Hlíðarenda næstu árin.“

Hvernig horfir Hólmar sjálfur á framhaldið í Val?
„Ég horfi björtum augum á framtíðina í Val enda margt áhugavert í gangi. Ég tel okkur vera með mjög sterkt lið og það er frábær umgjörð í kringum liðið. Ég finn fyrir miklum vilja innan hópsins að gera eitthvað sérstakt, skila góðum frammistöðum og vinna titla fyrir Val,“ sagði Hólmar Örn að lokum.

Hólmar verður líklega í eldlínunni í kvöld þegar Valur mætir uppeldisfélagi Hólmars, HK, í Bestu deildinni. Leikurinn hefst klukkan 19:15 og fer fram í Kórnum.