Heimamenn í Betis fengu ódýra vítaspyrnu á 37. mínútu leiksins er Dodi Lukebakio fékk boltann í handlegginn á sér. Höndin virtist alveg upp við líkama þegar fyrirgjöfin kom en dómarinn var viss í sinni sök og benti á punktinn.

Isco skoraði af punktinum. Nokkrum mínútum áður hafði Sergio Ramos bjargað á línu frá Pablo Fornals.

Sevilla jafnaði metin snemma í síðari hálfleik með skalla Kike Salas eftir hornspyrnu Marcos Acuna og færði þetta mark þeim gott stig.

Betis missteig sig í baráttu um Evrópusæti en liðið er í 7. sæti með 49 stig. Það sæti gefur þátttöku í Sambandsdeild Evrópu, en Valencia, sem er tveimur stigum á eftir þeim, á leik til góða.

Sevilla er ekki í baráttu um að komast í Evrópukeppni en liðið er heilum ellefu stigum á eftir nágrönnum sínum.

Granada, sem er í næst neðsta sæti deildarinnar, vann heldur óvæntan og öruggan 3-0 sigur á Osasuna. Facundo Pellistri, sem er á láni frá Manchester United, gerði fyrsta mark Granada en þeir Myrto Uzuni og Lucas Boye bættu við forystuna í síðari hálfleik.

Þetta ætti að gefa liðinu vonarneista í fallbaráttunni, þó liðið sé tíu stigum frá öruggu sæti þegar fimm leikir eru eftir.

Úrslit og markaskorarar:

Betis 1 - 1 Sevilla
1-0 Alarcon Isco ('38 , víti)
1-1 Kike Salas ('56 )

Cadiz 1 - 1 Mallorca
0-1 Vedat Muriqi ('12 )
1-1 Omar Mascarell ('59 , sjálfsmark)

Granada CF 3 - 0 Osasuna
1-0 Facundo Pellistri ('29 )
2-0 Myrto Uzuni ('48 )
3-0 Lucas Boye ('90 )

Villarreal 3 - 0 Rayo Vallecano
1-0 Alexander Sorloth ('18 )
2-0 Yerson Mosquera ('69 )
3-0 Alexander Sorloth ('74 )