Ísland endar Þjóðadeildina að þessu sinni án stiga í A-deild. Ísland mætti Belgíu í kvöld en fyrir leikinn var það ljóst að Ísland var fallið niður í B-deild Þjóðadeildarinnar.

Mikil meiðsli eru að hrjá íslenska liðið. Alfreð Finnbogason meiddist í upphitun og varð þar með 11 leikmaðurinn inn á meiðslalistann. Sá listi inniheldur leikmenn eins og Gylfa Þór Sigurðsson, Jóhann Berg Guðmundsson, Ragnar Sigurðsson og fleiri.

Arnór Ingvi Traustason kom inn í byrjunarlið Íslands í stað Alfreðs. Ísland spilaði með þriggja manna hafsentakerfi í kvöld og virkaði það ágætlega framan af gegn ógnarsterku liði Belga.

Efnilegir leikmenn eins og Albert Guðmundsson og Arnór Sigurðsson fengu að byrja þennan leik. Þeir fengu tækifæri til að sýna sig fyrir Jose Mourinho sem var í stúkunni. Jón Dagur Þorsteinsson, sem á svo sannarlega framtíðina fyrir sér, kom þá inn á þegar lítið var eftir.

Geggjað að fá Aron Einar aftur, þvílíkur leiðtogi! Albert og Arnór augljóslega tilbúnir í stærri hlutverk. Báðir óhræddir við að halda boltanum og taka menn á. Nauðsynlegt að spila þeim áfram í næstu verkefnum.

— Óttar K. Bjarnason (@ottar09) November 15, 2018

Batshuayi sterkur í síðari hálfleik
Fyrri hálfleikurinn var ágætur hjá íslenska liðinu. Varnarleikurinn var góður og skipulagið hélt vel. Belgarnir fengu ekki mörg álitleg færi í fyrri hálfleiknum en í seinni hálfleiknum breyttist það.

Fyrsta mark leiksins kom á 64. mínútu og það skoraði Michy Batshuayi, sóknarmaður Valencia á Spáni (á láni frá Chelsea) eftir góðan undirbúning frá Thomas Meunier og Eden Hazard. Vörn Íslands sofnaði á verðinum og Belgía refsaði.

Batshuayi bætti við öðru marki sínu á 81. mínútu. Hannes Þór í marki Íslands átti að gera betur í því marki.

11 manna meiðslalisti stútfullur af lykilmönnum. Töpum fyrir einu besta landsliði heims á útivelli.

Tveir ungir leikmenn spila sína fyrstu landsleiki og annar ungur að byrja fyrsta alvöru leikinn.

Þessi leikur var aldrei að fara að bjóða upp á einhvern dóm. En ýmislegt jákvætt.

— Elvar Geir Magnússon (@elvargeir) November 15, 2018

Hvað þýða úrslitin
Lokatölur 2-0. Belgía er með níu stig, Íslands eins og áður segir án stiga. Belgía leikur úrslitaleik við Sviss um sigur í þessum riðli.

Belgía er besta landslið heims samkvæmt heimslista FIFA.

Síðasti sigur Íslands kom í október á síðasta ári gegn Kosóvó.

🇧🇪 Michy Batshuayi ⚽️⚽️#NationsLeague pic.twitter.com/QFwPwqTBNL

— UEFA Nations League (@UEFAEURO) November 15, 2018