„Mér fannst hann [leikurinn] mjög jafn, bara allan tímann. Við skorum þegar að það eru 20 sekúndur eftir í venjulegum leiktíma og þeir skora svo þegar að það eru 20 sekúndur eftir í framlengingu, þannig að þetta er súrt,'' sagði Árni Freyr Guðnason, þjálfari ÍR, eftir dramatískan leik í Mjólkurbikarnum gegn KA í dag. Liðið átti í fullu tré við Bestu-deildar lið KA og fékk grátlegt sigurmark á sig á 119. mínútu leiksins.
Lestu um leikinn: KA 2 - 1 ÍR
„Mér fannst þetta bara tvö jöfn lið og þeir vissulega búnir að vera í vandræðum í byrjun móts. Við erum ekki byrjaðir þannig að maður hafði kannski smá áhyggjur af leikforminu þegar líða fór á leikinn, en þetta gefur okkur bara helling fyrir fyrsta leik á mótinu.''
KA liðið hefur farið illa af stað í Bestu-deildinni og ekki með sjálfstraustið í botni. Var það rætt fyrir leik?
„Já, auðvitað gerum við það. Höfum náttúrulega skoðað þá og sjáum veikleika. Þetta er andlegt sport, að þegar að það er búið að ganga illa að fara að rífa sig allt í einu upp og fara að gera eitthvað. En við fókusum meira á okkur og hvernig við ætluðum að gera þetta, en jújú - við skoðuðum það aðeins,'' sagði Árni og glotti.
Í blálok framlengingar virtist Ívar Örn Árnason, fyrirliði KA, gerast brotlegur innan teigs en Sigurður Hjörtur Þrastarson dæmdi ekkert. Hvað gerist þar?
„Mér fannst það víti, en ég er náttúrulega ekki búinn að sjá þetta aftur. Mér fannst hann ágætis dómari og allt það, en hann leyfði rosalega mikið af svona návígum og bakhrindingum og svona djöflagangi. Miðað við línuna í leiknum að þá var hann aldrei að fara að dæma víti, en mér fannst þetta vera víti.''