Queens Park Rangers tóku á móti Leeds United í eina leik kvöldsins í ensku Championship deildinni og úr varð hin mesta skemmtun.

QPR er í fallbaráttu deildarinnar á meðan Leeds er í harðri toppbaráttu og gat bætt stöðu sína þar til muna með sigri hér í kvöld.

Svo varð þó ekki, þar sem nokkuð jafnræði ríkti innan vallar en færanýtingin gerði gæfumuninn. Heimamenn nýttu færin sín mun betur heldur en gestirnir og leiddu þeir 2-0 í leikhlé, eftir mörk frá Ilias Chair og Lucas Andersen.

Lyndon Dykes og Sam Field bættu við mörkum eftir leikhlé, er leikurinn hélt áfram í sama fari og áður og gestirnir frá Leeds klúðruðu sínum tækifærum á meðan QPR nýtti allt sitt.

Lokatölur urðu 4-0 fyrir QPR, sem er sjö stigum frá fallsvæðinu eftir annan sigurleikinn í röð.

Leeds er í öðru sæti þegar liðið á aðeins eftir að spila einn leik á deildartímabilinu - gegn sterku liði Southampton.

Leeds getur þó misst annað sætið frá sér, þar sem Ipswich Town situr í þriðja sæti með tvo leiki til góða og aðeins einu stigi minna.

Úrslit kvöldsins þýða að Leicester City er búið að tryggja sér sæti í ensku úrvalsdeildinni í fyrstu tilraun eftir að hafa fallið óvænt í fyrra.