Vonir Íslendinga voru miklar þegar flautað var til loka fyrri hálfleiks í Wroclaw.

Albert Guðmundsson kom Íslandi yfir með glæsilegu marki en í þeim síðari tóku Úkraínumenn við sér, skoruðu tvö og komust áfram.

Landsliðsmennirnir sátu því eftir með sárt ennið og missa af farseðlinum á EM.

„Mjög þungar tilfinningar. Það er ekki enn búið að setjast niður en maður er að fatta þetta betur og betur að þetta rann úr okkar greipum.“

„Mér fannst við vera mjög þéttir og skipulagðir. Spiluðum þegar við þorðum og áttum að spila en svo glutruðum við þessu niður,“ sagði Arnór við Fótbolta.net, en hann vildi þó ekki sérstaklega ræða mörkin sem Ísland fékk á sig.

„Það voru kannski ekki mörkin sem skiptu aðalmáli, heldur meira hvernig við komum til leiks í seinni hálfleik. Við þorum ekki að gera það sem við ætluðum og eigum að gera, hættum að spila boltanum og kýlum hann langt upp og þá erum við að bjóða hættunni heim.

„Ég myndi ekki segja að það væri hræðsla en við hættum bara að gera hlutina sem var frekar pirrandi svona eftir á að hyggja.“

Menn eru langt niðri núna en Arnór segir að nú þurfi menn að læra af þessu og gíra sig fyrir undankeppni HM. Stefnan er að komast á það mót.

„Mjög þungt en við þurfum einhvern veginn að læra af þessu og koma okkur út úr þessu sem fyrst. Taka undankeppnina fyrir HM með trompi og setja stefnuna þangað.“

„Klárlega við erum með marga góða og unga stráka. Við lærum af þessu og þeir líka, maður lærir mest þegar á móti blæs og það gerir það svo sannarlega núna. Við þurfum að taka þessu og undirbúa okkur fyrir undankeppnina.“

„Þegar maður hefur prófað það einu sinni þá vill maður gera það aftur. Stefnan er sett þangað,“ sagði Arnór í lokin.