Skoski bakvörðurinn Andy Robertson haltraði af velli í 1-0 tapi Skotlands gegn Norður-Írlandi í vináttulandsleik í gær en þetta er í annað sinn á nokkrum mánuðum sem hann meiðist í landsleik.
Liverpool-maðurinn fór úr axlarlið í leik með skoska landsliðinu í október eftir samstuð við Unai Simon, markvörð spænska landsliðsins.
Robertson var frá í þrjá mánuði áður en hann snéri aftur í hóp Liverpool í janúar.
Hann var í byrjunarliði Skotlands gegn Norður-Írlandi í gær en fór meiddur af velli á 37. mínútu vegna meiðsla á ökkla.
Jürgen Klopp. stjóri Liverpool, verður eflaust óhress með að fá þessar fregnir en Liverpool er að fara í gegnum mikilvægasta kafla tímabilsins.
Liverpool er í öðru sæti deildarinnar með 64 stig eins og Arsenal sem er á toppnum. Arsenal mætir Manchester City á Etihad og á því Liverpool möguleika á að komast á toppinn, það er að segja ef liðið vinnur Brighton.
Athugasemdir