Andri Lucas Guðjohnsen var allt í öllu hjá Lyngby í dag en liðið mætti botnliði Hvidovre á heimavelli í úrslitakeppni dönsku úrvalsdeildarinnar.
Andri gat komið heimamönnum á bragðið eftir tuttugu mínútna leik en honum brást þá bogalistinn af vítapunktinum. Þetta nýttu gestirnir sér í síðari hálfleiknum og komust yfir á 64. mínútu með marki frá Tobias Thomsen, fyrrverandi leikmanni Vals og KR.
Lyngby fékk aðra vítaspyrnu þegar um tuttugu mínútur voru til leiksloka og aftur steig Andri á punktinn. Nú skoraði hann af öryggi og niðurstaðan því 1-1 jafntefli. Andri og Kolbeinn Birgir Finnsson spiluðu allan leikinn en Sævar Atli Magnússon lék rúman klukkutíma.
Lyngby er tveimur stigum fyrir ofan fallsæti á meðan Hvidovre er pikkfast við botninn.
Þá spilaði Willum Þór Willumsson allann leikinn fyrir Go Ahead Eagles þegar liðið tapaði á útivelli gegn Utrecht í hollensku úrvalsdeildinni. GAE er í áttunda sæti deildarinnar.